3‏/4‏/2013

سارح



ماشي سارح .. على ريقو مل البارح 
موش حابب يروح لدارو .. و معندوش حق عشاء صغارو 
توه عامين و هو يلوج على خديمه .. يوكل بيها العيلة و يعيش عيشة كريمه 
بيرو الشغل ولالو دار مقام .. و كتيبة المطالب ولاتلو اكبر غرام 
هاذي حكاية واحد من برشا ناس .. كثر عليهم الهم و مات فيهم الاحساس 
كتبت هل السطرين بش تتفكر شوية .. تعاون باللي تقدر و ماهيش مزية 

12‏/5‏/2009

حلمه

ساعات الواحد ما عاد يفهم شيء.. ما عادش يكبتي شيء .. مايلقاش تفسير للّي قاعد يصير .. تقولش النّاس عايشة في عالم و هو سارح في عالم .. ما عادش عارف أشكون المظلوم و أشكون الظالم ..
ساعات الواحد يجي بش يقول صحّة يقول سدّاف .. ساعات يتصرف على طبيعتو و ساعات تقول مغلّف بغلاف .. ساعات يمشي في بالو الدنيا تضحكلو و تطلع في الحقيقة تضحك عليه .. ساعات يمشي في بالو الطريق مستوي يطلع مقلوب سافيه على عاليه ..
تقول عليه في حلمه ولاّ هو كوشمار ما كذبش كيف قال الزمان غدّار ..
فاق.. يلقى روحو وحدو .. عرف اللّي خسر برشا حاجات .. و ولّى يخيّر عل كلام السكات ..
سمع واحد غنّى عليه .. قال له الصبر طيّب و غنّى ما تقولو ليه .. عرف اللّي ماهوش وحدو في هل الحالة .. أما هذا كلّو ما يبدّل شيء لا محالة ..
فمّة حاجة فيه ماتت .. ما عرفش أشنيّة .. ما هوش كيما قبل .. ما عادش ماشي فرد ثنيّة ..
في الوقت هذايا .. تبدلت الغناية .. كيما قال عشيرو: "اللّه كريم" .. هو اللّي بيه و بعبادو رحيم ..
ربّي يهدي ما خلق و برّا ..
حار و ماعرف آش يعمل .. قالّو عشيرو: أعمل كيفي.. و غنّى..
" من هنا و رايح أنا قلبي حيسامح.. وإن قالو قلبي جريح أحسن ما يقولو جارح .. "

أنّستو


11‏/5‏/2009

عدنا

أيّا قلنا السّلام عليكم ،
أيّا أشنيّة أحوالكم ؟
إن شاء اللّه تكونو في خير و نعمة ...
صارلي مديدة و أنا غايب على عالم التّدوين و ما نخبّيش عليكم ما فمّاش مبرّر للغياب .. ممكن شويّة بخل و شويّة تقصير ..
الحاصل هاني رجعت .. و في مخّي برشا أفكار جديدة بقدرة ربّي ترى النّور عن قريب ..
المدوّنة كيما شفتو عملت عمليّة تجميل ( هيفاء ولاّ نانسي ماهمش خير .. ) هذا شكلا و أمّا مضمونا المدوّنة بش تولّي أعم و أشمل ..
المهم إن شاء اللّه ماعادش نغيب عليكم ..

أنّستو